1Ti 3 | AEY | STEP | Je i eu je mele, dana oso uqa tamanec cofadec matu bilec cabi eu ugen ec gale donafi eu uqa cabi binanca bahic gale dona.

1 Timothy 3

Tamanec cofadec matu age ititom kobol coboigale

1 Je i eu je mele, dana oso uqa tamanec cofadec matu bilec cabi eu ugen ec gale donafi eu uqa cabi binanca bahic gale dona. 2 Tamanec cofadec matu mudec eu dana odi biliale. Oso uqa cahuldocca qee, uqa hutan me qee eu cain muduwain. Uqa caja osol gemug. Uqadodoc duman cofdu cuhadugian. Uqa gesili fecca, uqa loo cahulecca, uqa iwaldocnu hutan meca, uqa kobol me tutuc himec toodugian. 3 Uqa ceu jeceb dalul cain qoiaun, uqa hihiban cain teiaun qa waug susumulca, malolca biligian. Uqa meen qaig ocnu himec cain cisdoiaun. 4 Uqadodoc uqana aideg talaculca gami kobol mena tutuc cofadi maadigian. Odimei uqana mel mel aidca odadeceb uqanu jogoi bileig uqa jejeg toodu odoqagan. 5 Ge, dana oso uqana aideg talaculca kobol mena iwaladecnu qee donafi Anutna tamanec adi me cofdu cuhadugian? 6 Gadgad uqa waug cisdoc toodu deboeceb Anut uqa Seten geuldenwe eu odi geuldeiannu cofadec matu eu uqa wawaga meleec haun cain biliaun. 7 Dana wawaga qee meleena ageha cofadec matu uqana cobocnu madi, uqa me, oqagan. Qeefi, uqanu hutan me qee madowainnu, odocob uqa Setenna aisaisna toni qugian.

Tamanec cesuldoc cabi dana cunug age tutuc coboigale

8 Eu odiwe tamanec cesuldoc cabi dana eu dana agenu hutanaga me himec coboigale. Age dana conoga lecisca cain biluwain. Age ceu jecebil dalul cain aqeiaun. Age dana agena meen qaig celcel qauadecna ocnu cain cisdowain. 9 Age wawaga meleec uqana caun eu jahunec nijia eu agena cisdoc madi, eu mele, ena odi hehewi biluqagan. 10 Dana eundec age casac temadi feigale. Age me ihoc lec eu camasac meceb fifeig tamanec cesuldoc cabi dewenegana meiga. 11 Eu odiwe age aidagailha agenu hutanaga me himec coboigale. Age osonu hibiloh je me qee cain madowain. Age agedodoc dumanaga cofdu cuhadoigale. Age ceteh cunugnu mele je himec madoqagan. 12 Tamanec cesuldoc cabi dana uqa caja osol uqana dana himec biligian. Odimei uqana aideg talaculca gami kobol mena tutuc cofadi maadigian. 13 Ge, tamanec cesuldoc cabi dana age agena cabi me ogina eu age ijanaga me oqagan. Odimeig age Jisas Kraisnu wawaga meleenanu dana cajaca je gagadicca maadecnu ihoc.

Anutna kobolnu je gug

14 Ija mahucwe humig hina fecihecnu cisdugina qa ceteh oso cahactecebfi jaqec je ina dado mihimei hina Anut talaculna adi me bilegannu qila ija je i jaqihigina. Talacul eu Anut cebac bilina uqana tamanec, eu mele je cofdudu hehdona. 16 Ege mele doqona, Anutna kobolnu je gug eu me bahic me, oso eunu qee sasac qocwe qee. Je gug eu ege odi qasali madoqona:

“Uqa dana deweg ocna camas men.
Kis Gun uqana gug eu tutuc bahic ege ihacgen.
Ensel age fecidoin.
Agena malogom age uqana je dana hatuhatu bilegina age gemo maadecebil dah mein.
Mahanadec age uqanu wawaga meleena.
Anut uqa ehudi sao jobon teceb uqa binan ben on,” oqona.